Bank Loans Unavailable in all Banks

Author : Faydety Egypt | Published On : 08 Mar 2021

القروض البنكية هي من أشهر المنتجات اللي بيتابعها الجمهور، بسبب وجود أنواع كتير منها، وكل نوع مخصص لـ تمويل شيء محدد. أشهر أنواع القروض البنكية هي القروض الشخصية، وقرض العربية، والتمويل العقاري، أو قرض المنازل ودول تقريبا موجودين في معظم البنوك، بعكس بعض الأنواع اللي موجودة في بنوك محدودة، منهم:

1- قروض المدارس:

القروض دي متاحة تقريبا لكل الناس باختلاف طبيعة شغلهم، حتى أصحاب المعاشات، وتعتبر نوع من أنواع القروض الشخصية. ونسبة قرض مصاريف المدارس بيختلف من بنك لبنك وبيوصل فى بعض البنوك لـ 100% من نسبة المصاريف.

في 9 بنوك بتقدم قرض المدارس، هي:

  • بنك مصر
  • المصرف المتحد
  • SAIB
  • CIB
  • العربي الأفريقي
  • QNB الأهلي
  • بنك ناصر الاجتماعي
  • بنك القاهرة
  • EG Bank

2- قروض عضويات النوادي :

في أكتر من بنك في مصر بيوفر فرصة الاشتراك في النوادي المعروفة وبيموّل لغاية 100% من قيمة العضوية، وده بيساعدك تشترك في النادي اللي نفسك فيه بتقسيط بسيط، وده كمان يعتبر واحد من القروض الشخصية.

قرض النوادي موجود في  5 بنوك، هي:

  • بنك مصر
  • البنك الأهلي
  • بنك البركة الإسلامي
  • البنك العقاري المصري
  • بنك قناة السويس

3-  قرض السفر والرحلات:

عارف أنك تقدر تسافر والبنك يمول سفريتك، يعني تقدر تستجم أو تقضي شهر العسل بالتقسيط. مدة تسديد القرض ده بتوصل لغاية 5 سنين.

4- قرض دراجه:

بخلاف قروض العربيات في قرض تاني خاص بالمواصلات، هو قرض الموتوسيكل، واللي يعتبر من أكتر القروض اللي مش مشهورة، وموجود فى بنكين بس فى مصر، بنك مصر وبنك QNB الأهلي، وقيمة القرض بتوصل لـ 100 ألف جنيه، وممكن يغطي لغاية 100% من تمن الموتوسيكل. وبعكس قرض العربية، مفيش شرط التأمين على السكوتر في البنكين.

5- قروض الشباب:

 مع انتشار المشاريع الشبابية، زادت الجهات الممولة ليها ومن ضمنها البنوك اللي عندها منتج اسمه قروض الشباب، وهو عبارة عن تمويل المشاريع الصغيرة للشباب عشان تساعد فى حل مشكلة البطالة.

قرض البنك لتمويل مشاريع الشباب موجود فى 6 بنوك، هي:

  • البنك الأهلي
  • بنك مصر
  • البنك الزراعي المصري
  • CIB
  • العربي الأفريقي AAIB
  • بنك الإسكندرية

6- قرض البنك للسلع المعمرة:

من أكتر أنواع القروض المختلفة قرض السلع المعمرة، اللي بيستخدم  فى شراء الأجهزة الكهربائية و الموبيليا، وبيعتبر مفيد للداخل على جواز واللي بيفرش مكتبه جديد. القرض ده قيمته بتبدأ من 75 ألف جنيه وبتوصل لـ 500ألف جنيه فى بعض البنوك.